நந்திக்கடல் தரும் செய்தி

நந்திக்கடல்  தமிழர்களின் எதிர்கால அரசியல் வரைபடத்தை இரு முக்கிய எண்ணக் கருக்களை மையப்படுத்தி எச்சரிக்கையுடன் பதிவு செய்கிறது.

01. புவிசார் அரசியல்

02. கட்டமைக்கப்பட்ட இன அழிப்பு.

தமிழின அழிப்புடன் தமிழர்களின் இராணுவ – அரசியல் பிரதிநிதிகளை அகற்றுவதன் மூலம் வெளித்தரப்பு இந்து சமுத்திர அரசியலை கையாள ( எண்ணெய்க்கு அடுத்து தண்ணீர்தான் – கடல்தான் உலக அரசியல் – நந்திக்கடல் கோட்பாடுகளின் வடிவமே இதுதான் ) இலங்கைத் தீவில் உள் நுழைவதனூடாக உருவாகும் புவிசார் அரசியலை தமிழர்கள் கையாளும் தந்திரங்களை வகுத்துக் கொள்ள வேண்டும் என்பது முதல் எச்சரிக்கை.

அடுத்து நேரடி இன அழிப்பை முடித்த சிங்களம் கட்டமைக்கப்பட்ட இன அழிப்பினூடாக மீதி தமிழர் இருப்பையம் நிர்மூலம் செய்யும் என்பது இரண்டாவது எச்சரிக்கை.

எனவே இவ்விரு தளங்களிலும் காத்திரமான எதிர்வினையை புரியும் சூட்சுமங்களுடன் தமிழர் அரசியல் வரைபடம் வரையப்பட வேண்டும் என்பதே நந்திக்கடலின் எச்சரிக்கையுடன் கூடிய காத்திரமான செய்தி.

தோல்வி மனநிலையிலிருந்து இதை வகுக்க முடியாது. அதுதான் நந்திக்கடல் தன்னை தோல்வி மனநிலைக்குள் உட்புகுத்திக் கொள்ளவில்லை.

அதுதான் தெளிவான கோட்பாட்டை அதனால் வகுக்க முடிந்தது.

புவிசார் அரசியலின் தாக்கத்தை உணர்ந்து அதைப் பேசுபொருளாக்கிச் சிலர் அதை ஒரு அரசியல் வரைபடமாக்க முயன்றார்கள்.

இதற்கு கஜேந்திரகுமார் தரப்பை உதாரணமாகச் சொல்லலாம்.

வேறு சிலர் மேற்படி புரிதலுடன் கட்டமைக்கப்பட்ட இன அழிப்பின் தார்ப்பரியங்களையும் சேர்த்து ஒரு அரசியல் வரைபடத்தை வரைய முயன்றார்கள்.

இதற்கு தமிழ்நெற் ஊடக வலையமைப்பை உதாரணமாகச் சொல்லலாம்.

 

ஆனால் எதிரிகளின் நிகழ்ச்சி நிரலின் பிரகாரம் தோல்வி மன நிலைக்குள் தன்னை ஆட்படுத்திக் கொண்ட ஒரு கும்பல் இரு தரப்பையும் காலி செய்தது – இன்னும் அதற்கு முயன்று கொண்டேயிருக்கிறார்கள்.

கேலியும், கிண்டலும், நையாண்டியும் தனி மனித அவதூறுகளுமாக ஒரு இனத்தின் அரசியல் இருப்பு நிர்மூலமாக்கப்பட்டு வருகிறது.

இதில் எதிரிகளின் உளவுத்துறை ஒரு புறம் நமது தரப்புத் தற்குறிகள் மறுபுறம் என்று விபரீதமான ஒரு புறச்சூழல்.

இதற்காக யாரை நோவது என்பது கூடத் தெரியவில்லை.

ஆனாலும் விரைவில் தோல்வி மனநிலையிலிருந்து மீண்டெழுந்து – இணக்க அரசியலைத் தாண்டி நந்திக்கடலின் மேற்படி அரசியல் வரைபடத்தின் வழி நாம் போராட்டத்தை மீளக் கட்டியெழுப்புவது அவசியம்.

இல்லையேல் அழிவது உறுதி.

#ElevenYearsGenocide.

பரணி கிருஸ்ணரஜனி