🔺நுழைவுவாயில் 🔺
~~~~~~~~~~~~~~~~~~
விடுதலைப் போர் மிகவும் இறுக்கமான கட்டத்தை அடைந்து கொண்டிருந்த 2008ம் ஆண்டின் மே மாதம் இடியாக இறங்கியது பால்ராஜ் அவர்களின் சாவுச் செய்தி. எத்தனையோ களமுனைகளில் விழுப்புண் அடைந்தும் வீழாத அந்த வீரனை, மிகவும் இக்கட்டான ஒரு கட்டத்தில் புலிகள் இழந்ததென்பது அந்த இயக்கத்திற்கு மட்டும் ஏற்பட்ட ஒரு பாரிய இழப்பாக பார்க்க வில்லை. தங்கள் எல்லோருக்கும் ஏற்பட்ட ஒரு பேரிழப்பாகவே தமிழினம் கருதியது.
'ஆனையிறவு எவர் வசம் இருக்கின்றதோ அவர்கள் வசமே யாழ்குடா இருக்கும்' என்பது போரியல் வல்லுனர்களின் கருத்தாக இருந்தது. அந்த ஆனையிறவை வெற்றிகொள்வதற்கு புலிகள்'ஆகாய கடல் வெளி எனும் பெரும் மரபுவழிச் சமரை நடத்தியிருக்கின்றார்கள். அவற்றைவிட பெயர் குறிப்பிடாத எத்தனையோ நடவடிக்கைகளை அத்தளத்தின் மீது மேற்கொண் டிருக்கின்றார்கள். இறுதியாக அவர்கள் ஆனையிறவை வெற்றிகொண்டது குடாரப்புத் தரையிறக்கத்தின் மூலமாகத்தான். மிகவும் ஆபத்து மிகுந்த குடாரப்புத் தரையிறக்க நடவடிக்கையைச் செய்வதற்கு 1200 போராளிகளைக் கொடுத்து தலைவர் அனுப்பி வைத்திருக்கின்றார் என்றால், பால்ராஜ் மீதிருந்த அளவு கடந்த நம்பிக்கைதான் காரணம். தலைவரின் நம்பிக்கையை உறுதியாக்கி, விழுத்தவே முடியாது என்று சிங்களம் இறுமாந்திருந்த ஆனையிறவை வீழ்த்தி வெற்றிகொண்டது மட்டுமல்ல, நவீன போரியல் வரலாற்றில், வெற்றிகரமான தரையிறக்கத்திற்குப் பெயர் பெற்றது பிரான்சிலுள்ள நோர்மோண்டித் தரையிறக்கம். இரண்டாம் உலகப் போரில் கிட்லரின் நாசிப்படைகளின் பிடியிலிருந்து பிரான்ஸ் நாட்டை மீட்டெடுக்க மேற்கொள்ளப்பட்ட அந்தத் தரையிறக்கத்திற்கு நிகராக, குடாரப்புத் தரையிறக்கத்தை பால்ராஜ் அவர்கள் வரலாற்றில் பதியவைத்தார். வரலாற்றின் பொன் எழுத்துக்களில் பொறிக் கப்பட்ட அந்த வெற்றியின் நாயகன் பால்ராஜ் அவர்கள்தான். 1991ல் 53 நாட்கள் போர்புரிந்தும் மீட்கமுடியாத ஆனையிறவை, அன்றையதை விட மிகக் குறைந்த போராளிகளின் இழப்புக்களுடன் 34 நாட்களில் புலிகள் வெற்றி கொள்ள முடிந்ததென்றால், பிரிகேடியர் பால்ராஜ் அவர்களின் தலைமையிலான குடாரப்பு தரையிறக்கம் மிக முக்கியகாரணம்.
மறைந்த மாமனிதர் தராகி சிவாராமுடன் பரிசில் அமைந்திருந்த ஈழமுரசு அலுவலகத்தில் ஒருநாள் உரையாடிக் கொண்டிருந்த போது ஒரு தகவலைக் கூறினார். அமெரிக்க இராணுவத்தின் கட்டளைத் தளபதியாக இருந்த ஒருவர், கொழும்பில் தன்னுடன் உரையாடிக்கொண்டிருந்த போது, ஓர் உதவி செய்து
தருமாறு தன்னிடம் கேட்டிருந்தாராம். புலிகளிடம் தனக்கிருக்கும் தொடர்பை, செல்வாக்கைப் பயன்படுத்தி அதற்கான ஏற்பாட்டைச் செய்து தருமாறு அவர் தன்னிடம் கோரியிருந்ததாகத் தராகி கூறினார். அந்த அமெரிக்கப் படைத் தளபதி கேட்டிருந்த உதவி, தளபதி பால்ராஜ் அவர்களை நேரில் சந்தித்து உரையாடுவதற்கான வாய்ப்பு.
தளபதி பால்ராஜ் பல போர்க் களங்களைச் சந்தித்திருந்தார் என்பதும் பல வெற்றிகரமான தாக்குதல்களை முன்னின்று நடத்தினார் என்பதும் உலகறிந்த உண்மைதான். அதேவேளை, புலிகளிடம் அவரைவிட எத்தனையோ பல தளபதிகள் இருந்தார்கள். ஆனால், 'பால்ராஜை மட்டும் பிரத்தியேகமாக சந்திப்பதற்கு ஏன் இவ்வளவு முக்கியத்துவம் கொடுக்கின்றீர்கள்?' எனத் தான் அவ் அமெரிக்கப் படைத் தளபதியிடம் கேட்டாராம். அப்போது,
'குடாரப்புத் தரையிறக்கம் பற்றி தான் பால்ராஜிடம் இருந்து நேரடியாக அனுபவத் தகவல்களைப் பெற விரும்புவதாக' அந்தப் படைத்தளபதி தன்னிடம் கூறியதாகத் தராகி சிவராம் அவர்கள் அந்த உரையாடலின்போது குறிப்பிட் டிருந்தார். இதனை ஏன் இங்கு குறிப்பிடுகின்றேன் என்றால், பிரிகேடியர் பால்ராஜ் விடுதலைப் புலிகளின் சாதாரண ஒரு தளபதியல்ல, உலக இராணுவ வல்லுனர்களே வியந்து பார்த்த ஒரு சிறந்த வீரத் தளபதியாகவே அவர் இருந்திருக்கின்றார் என்பதற்காகத்தான்.
பிரிகேடியர் பால்ராஜ் அவர்களின் இழப்புச் செய்தி கேட்டவுடன், அவர் குறித்த விடயங்களை அறியவேண்டும், அவற்றை பத்திரிகையின் ஊடாக மக்களிடம் கொண்டு சென்று சேர்க்க வேண்டும் என்ற பேராவல் ஏற்பட்டது. போர் மிகவும் இறுக்கமான கட்டத்தை அடைந்துகொண்டிருந்த நிலையில், தாயகத்தில் இருந்து அவருடன் நின்ற போரளிகளையோ, தளபதிகளையோ தொடர்புகொண்டு அவற்றைப் பெறுவதென்பது இயலாதிருந்தது. அப்போது நினைவுக்கு வந்தவர்தான் விதானையார். விடுதலைப் புலிகள் இயக்கத்தில் அவருக்கு கஜன் என பெயர் சூட்டப்பட்டிருந்த போதும், அவரது நடவடிக்கை களைப் பார்த்து பால்ராஜ் அவர்கள் சூட்டிய பெயர்தான் விதானையார்.
இந்திய இராணுவ காலப்பகுதியிலும், அதற்குப் பின்னரான சில காலப் பகுதியிலும் பால்ராஜ் அவர்களுடன் நின்றிருந்த விதானையார், பால்ராஜ் குறித்து எப்போதும் வியப்பாகப் பேசுவதைக் கேட்டிருக்கின்றேன். விதானை யாரிடம் இருந்து தகவல்களைப் பெற்று ஒரு சில வாரங்கள் அவற்றை வெளியிட முடியும் என்றே எண்ணினேன். ஆனால், மழையாகக் கொட்டிய அவரது அனுபவங்களை உள்வாங்கி, தொகுத்து எழுதத் தொடங்கியபோது, அது பெரும் வரலாறாக விரிந்துகொண்டே சென்றது. ஒரு சில வாரங்கள் அல்ல, சுமார் 52 வாரங்கள் தொடர்ச்சியாக வெளிவந்து வாசகர்களிடமும், தாயகத்தில் இருந்த பொறுப்பாளர்களிடம் இருந்தும் பெரும் வரவேற்பைப் பெற்றது. இன்னும் பல வாரங்கள் வெளிவரக்கூடிய தகவல்கள் நிறைந்து கிடந்தும், முள்ளிவாய்க்கால் பேரவலமும், விடுதலைப் புலிகளின் ஆயுதப் போராட்டத்தின் முடிவும் அந்தத் தொடரை 2009 மே உடன் இடைநிறுத்த வேண்டிய நிலையை ஏற்படுத்தியது.
25 ஆண்டுகால பால்ராஜ் அவர்களின் போராட்ட வாழ்வில் சுமார் மூன்று ஆண்டுகால, அதுவும் இந்திய இராணுவத்துடனான போரின் போது இடம்பெற்ற வரலாறே அத் தொடரில் பதிவாகியிருந்தது.புலிகள் கெரில்லாப் போராளிகளாக வாழ்ந்த காலமே அது. இந்திய இராணுவம் வெளியேறியதன் பின்னர், புலிகள் மரபுப் படையணியாக வளர்ச்சிகண்டனர். அதன் பின்னர் சுமார் 18 ஆண்டுகள் களமுனையில் பால்ராஜ் அவர்கள் நின்றிருக்கின்றார். எத்தனையோ உலகம் வியந்த பல வெற்றிகரமான தாக்குதல்களின் தளபதியாக நின்று, படைகளை அவர் வழிநடத்தியிருக்கின்றார். அந்த அனுபவங்களை அவருடன் நின்ற போராளிகள் வரலாறாகப் பதிய முனைந்தால் அது இன்னும் இன்னும் பல நூற்றுக் கணக்கான பக்கங்களாக விரிந்துசெல்லும்.
இது பால்ராஜ் என்ற மாவீரனின் விடுதலைப் போராட்ட வாழ்வின் ஒரு சிறு பகுதி மட்டுமே. இதில் பிரிகேடியர் பால்ராஜ் அவர்கள் மட்டுமல்ல, அவருடன் இணைந்து நின்று களமாடிய எத்தனையோ மாவீரர்களின் வரலாறுகளும் உள்ளடங்கியுள்ளன. 'போராளிகளை மதித்து நடத்துவதில் பால்ராஜ் அண்ணா விற்கு நிகர் யாரும் இல்லை' யென்று, அவருடன் நின்ற ஒவ்வொரு போராளியும் கூறியிருக்கின்றனர். இந்த வரலாற்றைப் படிக்கும்போது அந்த உண்மையை நீங்கள் ஒவ்வொருவரும் உணருவீர்கள்.
-கி.ஜெய்சந்தர்
பொறுப்பாசிரியர் ஈழமுரசு
20.04.2016.
-பசீலனின் இன்னொரு போர்முகம் பால்ராஜ்
